अभिनय र कविताले लोभ्याउँदै पूजन

एक नाटकमा अभिनय गर्दै पूजन थापा

कक्षा–६ मा पढ्दा पहिलोपटक अभिनय गर्न शिक्षकले लगाउँदा अलमलमा परेकी पूजन थापा चार वर्षकै अवधिमा नाट्य कलाकारितामा पोख्त भइसकेकी छन् । कक्षा–१० मा पढ्दै गरेकी इटहरी–२ की पूजनले यो अवधिमा थुप्रैपटक आफ्नो प्रतिभा अभिनयमार्फत प्रस्तुत गरेकी छन् । उनको अभिनय देख्दा मख्ख नपर्ने सायदै होलान् ।
अभिनयसँगै उनले लेखेका कविता मन पराउनेको जमात पनि सानो छैन । ‘अभिनयमा रुचि भएकाले गर्दा त्यसमा राम्रो गरौं भनेर लागेकी छु, अनि सानैदेखि कविता लेख्ने बानी हो, मेरो दौंतरीको तुलनामा कविता पनि गतिला लेख्छु भन्ने लाग्छ,’ उनले भनिन् ।  कवितासँगै निबन्धमा पनि उनलाई विशेष चासो छ । प्रतियोगितामा भाग लिँदा गतिला कविता लिएर भिडसामु जाने गरेकी पूजनले अधिकतर कार्यक्रममा पुरस्कार हात पार्ने गरेकी छन् । यस वर्ष जुनियर रेडक्रस सोसाइटीले आयोजना गरेको जिल्लास्तरिय कविता प्रतियोगितामा तेस्रो पुरस्कार उनकै भागमा प¥यो ।
स्कुल, विभिन्न क्लब, सङ्गीत प्रतिष्ठानले बेला–बेलामा आयोजना गर्ने कार्यक्रममा सहभागी हुँदाहुँदै अभिनयतर्फ  लगाव बढेको सफलता हात पार्दै आएको उनको बुझाइ छ ।  अभिनयमा आफूलाई निखार्न सुरुवातमा पूर्वाञ्चल सङ्गीत विद्यालयमा प्रशिक्षण लिएकी पूजन अहिले कलालयमा कला र अभिनयकी विद्यार्थी पनि हुन् ।
कलालय इटहरीले सञ्चालन गरेको स्कुल थिएटरको पहिलो र दोस्रो संस्करणमा उनको जोडदार अभिनयले प्रशस्तै प्रशंसा कमायो । गएको भदौ महिनामा कलालयले नै आयोजना गरेको गृहिणीहरुको नाटक होम थिएटरमा सहयोगी भूमिकामै उनका प्रशंसकहरु थपिए । होम थिएटरमा ‘सङ्गी...’ बोलको गीतमा गरेको अभिनय र स्कुल थिएटरमा ‘रङ्गमञ्च उठेपछि आयौ...’ बोलको गीति नाटकमा उनले गरेको अभिनयले थुप्रैका आँखा मात्र रसाएनन्, उनको चर्चा समेत चुलिँदै गयो ।
अघिल्लो वर्ष ‘को बन्छ कलाकार’ रियालिटी सोमा भाग लिँदा मुलुकभरबाट उनी टप ट्वाइन्टीमा परेको सुनाइन् । ब्राइट फ्यूचर सेकेन्डरी स्कुल आँपगाछीमा अध्ययनरत् उनलाई सुरुवातमा आमाको मात्र साथ भए पनि सफल अभिनय गर्न थालेको थाहा पाएर बुबालेसमेत सहयोग गर्न थालेका छन् । उनको अभिनयलाई थप प्रमोसन गर्न उनलाई नाटकको प्रशिक्षण दिने कलालयले पनि प्रयत्न गरिरहेको  छ । आफ्नै गुरु भरत पोखरेललाई अभिनयमा लाग्न प्रेरणाको स्रोत सम्झिन्छिन् उनी । ‘भरत सरले स्कुलमा अभिनय गर्न लगाएकै कारण बिस्तारै सफलता हात पार्दैछु,’ उनले भनिन् ।
उनी पढाइमा पनि राम्रो विद्यार्थीमा पर्छिन् । कक्षामा पाँचौभन्दा पछाडि उनको रोल नम्बर छैन । पढाइलाई असर नपर्ने गरी अभिनयमा लाग्ने गरेको उनले सुनाइन । अभिनयले पढाइलाई सहयोग पु¥याएको उनले महसुस गरेकी छन् । असल कलाकार बन्ने सुनौलो सपना साँचेर दुःख गरिरहेकी पूजनको भविष्य आशालाग्दो छ ।
प्रस्तुति ः अमर