पूर्वमा एसएलसी

जम्मा परीक्षार्थी ः १,२३,१६४
परीक्षार्थी नियमिततर्फ ः ९९,१०८
परीक्षार्थी एक्जाम्टेडतर्फ ः २४,०५६
आबद्ध विद्यालय ः १,७६९
परीक्षा केन्द्र ः ४२०
एसएलसी दिने विद्यार्थीको सङ्ख्या बढे पनि नियमित समूहतर्फ एसएलसी परीक्षामा उत्तीर्ण हुने विद्यार्थीको सङ्ख्या भने तीन वर्षयता लगातार घट्दो छ । शैक्षिक सत्र २०६५ मा ६८ हजार ९८२ जना (८० दशमलव १५ प्रतिशत) उत्तीर्ण भएकोमा २०६६ मा ५८ हजार ६५१ जना  (६२ दशमलव ४२ प्रतिशत) र २०६७ मा ४२ हजार ३६७ जना (४४ दशमलव ८० प्रतिशत) मात्र उत्तीर्ण भएको तथ्याङ्कले देखाउँछ । तथ्याङ्क तालिकामा दिइएको छ ः
अनियमितता गर्नेलाई सार्वजनिक मुद्दा
एसएलसी परीक्षामा अनियमितता गर्नेलाई कसुर हेरेर सार्वजनिक अपराधसम्मको मुद्दा लगाउने तयारी भएको शिक्षामन्त्री दीनानाथ शर्माले बताएका छन् ।
‘परीक्षाको गोपनीयता, सुरक्षा र शुद्धतामा प्रभाव पार्न खोज्ने कसैलाई छाडिँदैन,’ उनले भने, ‘कसुर हेरेर सार्वजनिक अपराधसम्मको ऐन लगाएर कारबाही गर्न सकिन्छ ।’ शिक्षामन्त्री शर्माले अनुशासित र मर्यादित परीक्षा चलाउने प्रत्येक जिल्लाको उत्कृष्ट केन्द्रलाई पुरस्कृत गर्ने बताए ।
शिक्षा ऐनले परीक्षाको मर्यादा भङ्ग गरे कसुर हेरी एकलाख रुपैयाँसम्म जरिवाना र छ महिना कैद वा दुवै सजाय हुनसक्ने व्यवस्था गरेको छ ।
यता, परीक्षा नियन्त्रण कार्यालयकाअनुसार एसएलसी परीक्षाका लागि देशभर एक हजार सात सय ४८ परीक्षा केन्द्र तोकिएको छ । परीक्षामा ५६ हजार शिक्षक कर्मचारी संलग्न छन् ।